Grond interess dils scolasts sursilvans per il mied d’instrucziun ACCESS
Concept e realisaziun
Il meinaproject dil mied ACCESS, Francestg Friberg, ha informau ils presents davart ils resultats dil sondadi dalla Pro Idioms pertuccont ils mieds d’instrucziun romontschs realisaus la primavera 2012. Bunamein 100 scolastas e scolasts ein separticipai a quei sondadi ed han exprimiu ina gronda malcuntentientscha. Aschia ei la Pro Idioms Surselva sedecidida da producir in niev mied d'instrucziun da romontsch per las scolas popularas dalla Surselva.
En ina emprema fasa ein las spartas grammatica ed ortografia vegnidas elaboradas. Per tener quen dils basegns e giavischs dils scolasts e dallas scolastas ein treis finamiras stadas el center dalla elaboraziun. Il niev mied duei:
· esser innovativs e moderns
· tractar ils temas a moda profunda
· esser grammaticalmein ed ortograficamein corrects
Circa trenta scolastas e scolasts ein semess a disposiziun per realisar ils differents toms dil mied ACCESS. En entginas jamnas vegn il mied per las scolas primaras ad esser terminaus. Era al scalem superiur vegn luvrau intensivamein. Ei suonda igl onn proxim ulteriuras spartas.
Adrian Cathomas ha informau che biebein 800 licenzas seigien gia vegnidas vendidas. Mintga mied cuosti 6.— frs per scolar. En quei prezi seigi cumpriu il dretg da squitschar e copiar, ils ordinaturs cun frontispezis e la licenza da luvrar culs exercezis online. Igl entir project vegni finanziaus
dalla Pro Idioms cun 45'000.— frs. Las entradas dallas licenzas cuvierien mo ina fetg pintga part da quella summa.
Ils exercezis online fuorman ina dallas parts innovativas dil mied ed ein sensaziunals, quei tenor las declaraziuns da Marc Thoma, il programmader dalla pagina d'internet ACCESS.ac e dalla colligiaziun da Moodle. Negliu en Svizra detti ei in mied cumparegliabel. Ils scolars e las scolaras exerciteschien egl internet, e lur scolast ni scolasta vesi exact con ditg e cun tgei success ch'ei seigi vegniu exercitau. Igl entir concept innovativ sebasi silla plattafuorma d'emprender Moodle e possibiliteschi cul mied ACCESS da far part a moda fetg sempla da mieds d'emprender electronics.
Ils workshops
Suenter la presentaziun han rodund 80 scolastas e scolasts fatg part dils workshops d'ACCESS 2 - 7 per emprender d'enconuscher pli el detagl ils singuls mieds e per haver investa els exercezis da Moodle. Ils resuns davart ils workshops d'ACCESS ein stai fetg positivs. Ils menaders, per gronda part ils auturs e las auturas dil mied sezs, ein stai preparai fetg bein ed han dau buns impuls als participonts co duvrar il mied.
Engraziament
Nus engraziein da tut cor als auturs ed allas auturas dil mied, a prof. dr. Alexi Decurtins che ha currigiu entochen ussa ils differents toms, als scolasts che han transcret il mied en InDesign, al team da dunnas che ha copiau mintga illustraziun en ner ed alv. Ils collaboraturs dad ACCESS han prestau en tut rodund 2000 uras da lavur voluntaria. Plinavon engraziein nus a Sascha Maissen (grafikdeal.ch)
per la realisaziun dalla grafica dils frontispezis, ed a Marc Thoma per l'entira programmaziun dallaXpagina d'interneteXdaXMoodle. www.access.ac
Era la Conferenza generala ladina ei fascinada dil project ACCESS
Gia per ils 16 da november 2012 haveva la suprastonza dalla Conferenza ladina envidau Francestg Friberg da presentar il mied ACCESS. La halla plurivalenta da Lavin era fullanada. Ils rodund 150 presents ein stai incantai dalla presentaziun d'ACCESS che ha svegliau en numerus scolasts ladins buca mo igl interess, mobein era il fiug ed il plascher per realisar semeglionts mieds.